Парламент Мәжілісінде алимент өндіріп алу жөніндегі құжат қаралады

АСТАНА. KAZINFORM — Парламент Мәжілісінің қарауына «1993 жылғы 22 қаңтардағы Азаматтық, отбасылық және қылмыстық істер бойынша құқықтық көмек пен құқықтық қатынастар туралы конвенцияға өзгерістер енгізу туралы хаттаманы ратификациялау туралы» заң жобасы енгізілді.

- Аталған заң жобасы Қазақстан Республикасының «Халықаралық шарттар туралы» Заңына сәйкес әзірленді. Хаттамада уағдаласушы тараптардың аумақтарында кәмелетке толмаған балалардың пайдасына алимент өндіріп алу туралы сот бұйрықтарын тану және орындау бөлігінде түзетулер көзделеді. Бұл нормалар кәмелетке толмаған балалардың құқықтары мен мүдделерін қорғауды қамтамасыз етуге бағытталған, - деді Мәжілістің Заңнама және сот-құқықтық реформа комитетінің төрайымы Снежанна Имашева палатаның жалпы отырысында.

Сонымен қатар Мәжілістің қарауына «2002 жылғы 7 қазандағы Азаматтық, отбасылық және қылмыстық істер бойынша құқықтық көмек пен құқықтық қатынастар туралы конвенцияға өзгерістер енгізу туралы хаттаманы ратификациялау туралы» заң жобасы да енгізілді.

- Бұл заң жобасы бала құқықтарын қорғауды қамтамасыз етудегі ТМД аумағында құқықтық ынтымақтастықтың тиімділігін арттыруға бағытталған. Атап айтқанда, жасөспірім балаларға алимент өндіріп алу туралы сот актілері осы мемлекеттер аумағында танылып, орындалатын болады, - деді С. Имашева.

Бұған дейін өңірлерде бала құқықтарын қорғау басқармалары құрылатынын жазған едік.