Облыстық ІІД баспасөз қызметі мәлім еткендей, оқиға бүгін таңертеңгі 9:00 шамасында орын алған, деп хабарлайды pavlodarnews.kz.
«Павлодар - Шарбақты тас жолында Жетекші ауылының азаматын ауруханаға алып бара жатқан қызметтік көлік жыраға түсіп кеткен», - дейді баспасөз қызметінде.
Сол бағыт бойынша қатынаған өзге де жүргізушілер жедел жәрдем көлігін жырадан алып шығуға көмек көрсеткен. Абырой болғанда, зардап шеккендер жоқ. Денсаулық сақтау басқармасы баспасөз қызметінің ұсынған ақпаратына сүйенсек, науқасқа бүйрек шаншуы диагнозы қойылған.
Айта кетейік, өткен аптада Павлодар-Успен республикалық автожолында, Ресей Федерациясы шекарасының учаскесінде, Алматы-Новосібір бағыты бойынша "Volvo" көлігі істен шықты. Успен ауданының төтенше жағдайлар бөлімінің қызметкерлері жергілікті атқарушы органдардың қызметкерлерімен бірге құтқару шараларын жүргізді. Автокөлік жүргізушілеріне ыстық тамақ және жылы киімдер ұсынылды. Көліктің техникалық ақауы жойылғаннан кейін көлік сапарын жалғастырды. Құтқару шараларына ТЖД өрт сөндіру және апаттан құтқару жұмыстары қызметінен жүк автомобилін сүйреу үшін бір техника АЦ-40 (131) және жергілікті атқарушы органдарынан екі адам жұмылдырылды.