Павлодар-Нұр-Сұлтан бағытындағы жолды патрульдеу қызметінде жүрген құқық қорғаушылар жол шетінде тұрған автобусты көріп қалған. Жолда қалған автобустың артқы дөңгелегінің күпшегі (ступица) сынып қалған көрінеді. Жолаушылардың бәрі де Өзбекстан Республикасының азаматтары. Рейстік автобус Ресейден Өзбекстанға бағыт алып бара жатқан.

«Көлік құралының бұзылып қалуына байланысты жолаушылар бірнеше сағат жолда қалуға мәжбүр болған. Суық салонда тоңып қалғандар болды. Полиция қызметкерлері адамдар жылынып алу үшін оларды таяудағы кемпингке жеткізді. Бұған қоса тәртіп сақшылары автобусты жөндеуге көмектесті. Келесі күні түсте ғана көлік жөнделді. Жолаушылардың бәріне Ақсу қаласы полициясының Қалқаман бөлімінде ыстық шай мен бауырсақ, тамақ берілді», - деп хабарлайды ІІМ-нен.

Кетерде өзбекстандық жолаушылар павлодардық полиция қызметкерлеріне көмегі үшін алғыс білдіріп, қызметте табыс тіледі.

Бұдан бұрын павлодарлық тәртіп сақшылары Ресейден Қырғыз Республикасына бара жатқан 53 жолаушыға көмек қолын созған. Тағы бірде жолда тоңып қалған Тәжікстан азаматтарына да көмек көрсеткен.