Павлодар облысында балаларды бірінші сыныпқа қабылдау жүріп жатыр.
- Биыл өңір мектептері 11 мыңға жуық бүлдіршінді қабылдауды жоспарлап отыр. Ата-аналардан қазірдің өзінде 9 мыңға жуық өтініш түсті. Балалардың 51 %-ы қазақ сыныптарына барады. Әлі де өтініш беруге мүмкіндік бар, – дейді облыстық Білім беру басқармасының мектепке дейінгі және жалпы орта білім беру бөлімінің басшысы Айнагүл Абаева.
Ата-аналарға құжат тапсырудың бірнеше мүмкіндігі қарастырылған. Өтінішті OQU ұлттық білім беру платформасы немесе eGov.kz порталы арқылы онлайн түрде беруге болады. Сонымен қатар мектепке барып, қағаз түрінде тапсыру мүмкіндігі де сақталған. Қай тәсіл таңдалса да, өтініш белгіленген тәртіп бойынша бір жұмыс күні ішінде қаралады.
Еске сала кетейік, биыл 450 мыңға жуық балаға мектепке дайындалуға көмек көрсетіледі.