Павлодарда қарақшыдан бойжеткенді құтқарып қалған студенттер марапатталды
22:57, 06 Ақпан 2017
АСТАНА. ҚазАқпарат - Павлодарда қарақшыдан бойжеткенді құтқарып қалған Мақсат Қапанов, Валерий Яршуков және Мақсат Теміршот есімді студенттер марапатталды, деп хабарлайдыpavlodarnews.kz.
С.Торайғыров атындағы Павлодар мемлекеттік университеті баспасөз қызметінің мәліметінше, аталмыш оқу орнының металлургия, машина жасау және көлік факультетінің студенттері 2016 жылдың тамыз айында кешке үйге келе жатып, біреудің бойжеткенді тұншықтырып жатқанын көрген. Ол қыздың қолындағы сөмкені жұлып алып, қаша жөнелген. Сол жерде оқиғаға куә болған жігіттер қылмыскерді ұстап алып, полиция келгенше жібермей тұрған.
Студенттер Павлодар қаласы ішкі істер басқармасының бастығы Бағлан Байбуриновтың атынан алғыс хатпен марапатталды. «Павлодар қаласының ІІБ басшылығы қылмысты ашуға көмектесу барысында ерлік танытқаны үшін жастарға алғыс білдіреді», - делінген хатта.