Заңсыз әрекеттер республикалық «Тосқауыл» жедел-профилактикалық іс-шарасы барысында анықталған.
— Алғашқы оқиға сәлемдемелерді қабылдау бөлмесінде болған. Павлодар қаласының тұрғыны сотталған танысына әкелген сәлемдемені тексеру кезінде қызметкерлер шоколад қаптамасының ішіне шебер жасырылған ұялы телефонды тауып алды, — деп хабарлады Қылмыстық-атқару жүйесі департаментінен.
Ал арада бір сағат өткенде бақылау-өткізу бекетінде өндірістік аймаққа ағаш материалдарын тасымалдап бара жатқан жүк көлігі тексерілген. Кабинаны қарау барысында жолаушы орындығынан сымсыз құлаққаптар табылып, тәркіленген.
— Екі құқық бұзушыға қатысты ҚР Әкімшілік құқық бұзушылық туралы кодексінің 481-бабы бойынша әкімшілік хаттамалар толтырылды. Жиналған материалдар процестік шешім қабылдау үшін сотқа жолданады. Тексеру шаралары толықтай бейнетіркегішке түсірілді, — делінген департаменттің ақпаратында.
Департамент өкілдері түзеу мекемелерінің аумағына кез келген байланыс құралдары мен электронды құрылғыларды заңсыз жеткізу әрекеті үшін әкімшілік жауапкершілік қарастырылғанын ескертеді.
Еске сала кетейік, Алматыда қапқа жасырылған қару-жарақ табылды.