Павлодарда шәкіртін қайшымен ұрған хореограф сотқа тартылды
«1 желтоқсан күні Оқушылар сарайында өтіп жатқан сабақ кезінде хореограф Айсұлу Мералиева 2011 жылғы тәрбиеленушіні қайшымен ұрған, - деп хабарлады Павлодар облыстық сотының баспасөз қызметінде. - Сотта ол өз кінәсін мойындап, өкінетінін мәлімдеді. Іс тараптардың татуласуымен аяқталды».
Облыстық сотта хабарлағандай, би сабағы кезінде баланы ұрғаны үшін педагогқа қатысты әкімшілік іс ашылған. Бүлдіршіннің ата-анасы оны сотқа берген.
Оқушылар сарайындағы педагогтар оның осы мекемеде бірнеше рет жұмыс істеп, қайта шығып кеткенін айтқан. Оның үстінен бірнеше рет балалар да, ата-аналар да шағым түсірген. Мұғалімдердің айтуынша, Оқушылар сарайындағы жұмыс - мұғалімнің негізгі жұмысы емес. Ол көп уақытын косметика бойынша желілік бизнес саласындағы қызметіне бөледі екен.