Павлодарда шенеуніктер баспана құрылысына бөлінген 350 млн теңгені «сүрге сақтап» қойған

ПАВЛОДАР. KAZINFORM — Тереңкөл ауданының әкімдігі тұрғын үйге бөлініп, игерілмей қалған бюджет қаражатын арнайы шотта жасырып ұстап келген.

Өңірлік прокуратура мәліметінше, былтыр Тереңкөл ауданында әлдебір мердігер 24 пәтерлі үй тұрғызуды міндеттенген. Оны кейін жергілікті билік бюджет қаражатына сатып алмақшы болып келіскен. Алайда құрылыс салушы баспананы уақытында тапсыра алмай қалған. Ал жергілікті билік өкілдері құрылысқа бөлінген 350 млн теңгеге жуық қаражатты өздері ашқан арнайы шотқа аударып қойыпты. Шенеуніктер қаражат игерілмей қалады деп қорықса керек.

— Келісімшарт 2024 жылдың желтоқсан айында жасалған. Ақшаны аудару кезінде пәтерлер техникалық сипаттамаға сай болмай шыққан. Тереңкөл ауданының прокуратурасы сәйкесінше аударылған ақша негізсіз деп танып, оны қайтаруға қадағалау актін енгізді. Қазіргі уақытта ақшалай қаражат толық көлемде қайтарылды, — дейді прокурор Әділ Жұмабеков.

Белгілі болғандай, аталған тұрғын үй әлі күнге тапсырылмаған. Прокуратура бұл жайтты сыбайлас жемқорлық деп танып, аудандық сәулет және қала құрылысы бөлімінің басшысын жауапқа тартуды талап етіп отыр.

Еске сала кетейік, Абай облысында прокурорлардың арқасында 160 млн теңге бюджет қаржысы үнемделді.