Павлодардағы «Инвесторлар үйінде» келісімшартқа қол қою рәсіміне Павлодар облысы әкімінің орынбасары Арыстан Қабыкенов қатысты. Трактор Павлодардың бұрынғы автобазасында құрастырылады. Таяуда кәсіпорынға Қытайдан құрастыру желісі жеткізіледі. Қуаттылығы 300 аттың күшіне тең келетін техниканың алғашқы легін 2020 жылдың күзгі жиын-терім жұмыстарына дейін көпшілікке таныстыру жоспарланған.
«Бұл жобаны үш кезеңге бөліп, жүзеге асыруды жоспарлап отырмыз. Қазіргі базаның қолданыстағы инфрақұрылымын пайдалана отырып, жылына 3 000 трактор құрастыру қолға алынады. Жаңадан 50 жұмыс орны құрылады. Егер бәрі жоспар бойынша жүретін болса, 2021 жылы «Павлодар» арнайы экономикалық аймағының аумағынан әлдеқайда үлкен кәсіпорын салуды бастаймыз. Тиісінше, 150 жұмыс орны ашылатын болады. Бұл кәсіпорынның қуаттылығы жылына 30 мың техника құрастыруға дейін жетпек. Болашақта аталған өндірісті Павлодар облысында біржола дамытып, металл бұйымдары мен ауыл шаруашылығы техникаларына арналған бөлшектерді шығармақпыз», – дейді «KSW Agrotech» ЖШС бас директоры Рүстем Ибрагимов.
Инвесторлардың сөзінше, олардың тракторлары тек Қазақстанда ғана емес, жақын шет мемлекеттерде де сұранысқа ие болуы керек. Олардың басты артықшылығы – бағасында. Павлодарлық трактордың құны шамамен 130-150 мың доллар болады. Ал дәл осындай америкалық, еуропалық техникалар 500-700 мың доллар тұрады. Оның үстіне кәсіпорын өз тракторларын лизингке беруге және ауыл шаруашылығы өнімдеріне айырбастауға әзір.