Шарбақты тасжолының бойында, Галкин ауылынан облыс орталығына қарай келе жатқан отбасы еліктің кішкентай төлін байқап қалған. Олар жабайы жануарды өздерімен бірге ала кетіп, орманшылардың қолына тапсырған.
— Отбасы мүшелері бірден «109» бірыңғай байланыс орталығына хабарласқан. Орталық мамандары бұл ақпаратты Павлодар орман шаруашылығының қызметкерлеріне жолдаған. Көп ұзамай жеткен орман шаруашылығының мамандары кішкентай елікті өз жауапкершіліктеріне алды, — дейді Павлодар орман және жануарлар дүниесін қорғау мекемесінің басшысы Аждар Жүсіпов.
Қазіргі уақытта ол арнайы орынға орналастырылып, бақылауға алынған. Қажетті күтім жасалуда. Сиырдың және ешкінің сүтімен қоректендіріліп жатыр.
Орманшылар оны күзге дейін бағып, одан соң Ертіс өзені жайылмасындағы еліктерге апарып қоспақшы.
Еліктің лағын алғаш байқап, құтқаруға себепші болған отбасының мүшесі — Аделя есімді қыз бала жануарға Томи деген есім берген.
Еске сала кетейік, Ертіс орманында сирек кездесетін тарғақ құсы көзге түсті.