Павлодарда Ұлттық ұланның қару-жарағы мен әскери техникасы тексерілді

ПАВЛОДАР. KAZINFORM - Павлодар қаласында Ұлттық ұланның әскери техникасы мен қару-жарағының жауынгерлік әзірліктері пысықталды.

Жоспарлы техникалық байқау 5512 және 6679 әскери бөлімдерінде өтті. Әскери қызметшілер бұл шараға тыңғылықты дайындалған. Байқауға арнайы мақсаттағы бөлімшелердің техникасы, жеке құрамды тасымалдауға арналған жоғары өтімді көліктер, сондай-ақ қоғамдық тәртіп пен қаланың қауіпсіздігін қамтамасыз етуге бағытталған арнайы автокөліктер тартылды.

– Жыл сайынғы техникалық байқаудың басты мақсаты – әскери техниканы сапалы дайындап, бөлімшелердің жауынгерлік дайындығын жоғарғы деңгейде ұстау. Патрульдік қызметке арналған автокөліктердің, сондай-ақ қару-жарақ пен оқ-дәрілердің техникалық жағдайы жан-жақты тексеріледі. Ұлттық ұлан әскери бөлімдерінің жауынгерлік әзірлігі көбіне техниканың жеке құрамды белгіленген жерге уақтылы жеткізуіне тікелей байланысты, – дейді «Шығыс» өңірлік қолбасшылығы қолбасшысының техника және қару-жарақ жөніндегі орынбасары, полковник Азамат Ғабдуллин.

Тексеру қорытындысы бойынша барлық әскери техника сапалы күйде және кез келген тапсырманы орындауға толық дайын екені белгілі болды. Сонымен қатар, офицерлер мен жүргізушілердің де дайындық деңгейі назардан тыс қалмайды.

Айта кетейік, мұндай іс-шаралар Ұлттық ұланның «Шығыс» өңірлік қолбасшылығына қарасты барлық әскери бөлімдерде жыл сайын өткізіледі.

Еске сала кетейік, қазақстандық әскери қызметші АҚШ-та рекорд орнатты.