Прокуратура өңірдегі қылмыстық-атқару жүйесі мекемелерінде режим талаптарының сақталуын және тыйым салынған заттарды ішке өткізу арналарының анықталуын тексерді.
— Тексеру барысында мекемелердің біріндегі үй-жайдан 15 смартфон, алты Wi-Fi-роутер, сымды және сымсыз құлаққаптар, USB-кабельдер, флеш-карталар, Sony PlayStation ойын приставкасы және басқа да заттар табылып, тәркіленді, — делінген ведомствоның баспасөз қызметі таратқан хабарламада.
Бұл заттарды сотталғандарға сақтауға және пайдалануға тыйым салынған.
Осы дерек бойынша облыс прокуратурасы Қылмыстық кодекстің 371-бабы (салғырттық) бойынша сотқа дейінгі тергеп-тексеруді бастады.
Қазір тыйым салынған заттардың режимдік нысанға қалай жеткізілгені, оларды ішке өткізу арналары және бұған қатысы бар тұлғалар анықталып жатыр.
Қылмыстық-процестік кодекстің 201-бабына сәйкес, сотқа дейінгі тергеп-тексеру мүддесіне байланысты өзге мәліметтер жария етілмейді.
Еске салайық, бұған дейін Оралда түрмеге темекі тасыған колония қызметкері сотталғанын жазған едік.