Бастапқыда Павлодарға трамвай сатып алу Еуропа Қайта Құру және Даму Банкімен жасалған келісім аясында жоспарланған еді. Алайда 2025 жылдың соңында келісім бұзылған. Келісімшарт тікелей «Белкоммунмаш» ААҚ-мен жасалғанына байланысты ЕҚДБ оны қаржыландырудан бас тартқан.
— Шетел капиталын тартудан толық бас тартып, жобаны бюджеттік инвестициялар форматында жүзеге асыру туралы шешім қабылданды. Трамвай сатып алуға қаражат тікелей Павлодар қаласының бюджетінен бөлінді. Жеткізушіні анықтау үшін мемлекеттік сатып алу порталы арқылы ашық конкурс өткізілді. Конкурс қорытындысы бойынша жеңімпаз ретінде «АгробизнесҚазақстан» ЖШС танылды. Бұл — Қазақстандағы «Белкоммунмаш» ААҚ-ның ресми дистрибьюторы, — деп хабарлады Павлодар қаласының әкімдігінен.
Жыл басынан 10 жаңа вагон сатып алынып, Павлодарға жеткізілген. Шенеуніктердің ақпараты бойынша, жеткізуші валюта айырбастауға, Беларусь Республикасындағы зауыт-өндірушімен есеп айырысуға, сондай-ақ трамвайларды Павлодарға тасымалдап, жеткізуге байланысты барлық тәуекелдерді өз мойнына алды.
— Бір трамвай вагонының қорытынды құны — 440,8 миллион теңге, оның ішінде ҚҚС — 60,8 миллион теңге. ҚҚС-сыз құны 380 миллион теңге болады. Жасалған шарт талаптарына сәйкес вагондарды тасымалдауға, іске қосу-жөндеу жұмыстарын жүргізуге және кепілдік қызмет көрсетуге байланысты шығындарды жеткізуші көтереді, — деп қосты Павлодар қаласының әкімдігінен.
Сонымен қатар 2027 жылдың соңына дейін павлодарлық шенеуніктер тағы 65 жаңа вагон сатып алуды жоспарлап отыр. Сатып алу қаржылық лизинг арқылы жоспарлануда. Қазіргі уақытта жеткізушіні анықтау үшін мемлекеттік сатып алу кезеңі өтуде.
Еске сала кетейік, Павлодар трамвай паркі облыстың коммуналдық меншігіне өтті.
Павлодар билігі трамвай паркін жаңартуға 48,9 млрд теңге бағыттамақшы.