Павлодарлық фермерлер заңсыз иеленген субсидияларды мемлекетке қайтара бастады

ПАВЛОДАР. KAZINFORM - Ертіс-Баян өңірінің шаруалары 2020-2023 жылдары ірі қара мал бойынша жалпы сомасы 406 млн теңгеден астам субсидияны заңсыз алған. Прокуратура тексеруінен соң бұл қаражат қазіргі күні мемлекетке қайтарыла бастады. 

Былтыр облыстық прокуратура 2020-2023 жылдары агроөнеркәсіптік кешен саласындағы мемлекеттік бағдарламаларды іске асыруға бөлінген бюджет қаражатына тексеру жүргізген. Тексеру нәтижелері субсидияланған ірі қара мал шын мәнінде шаруалардың қолында болмағанын көрсетті. Фермерлер субсидияны заңсыз алып келген. 

- Тексеру қорытындысы бойынша 30 тауар өндірушіге сақталмаған мал басы үшін төленген субсидияларды қайтару туралы хабарлама жіберілді. Заңсыз төленген субсидиялардың жалпы сомасы - 406 941 855 теңге. Ал биыл 1 қаңтардағы жағдай бойынша 16 тауар өндіруші жалпы сомасы 52,9 млн теңгеден астам субсидияны мемлекетке қайтарды. Қалған қаражатты жыл соңына дейін өтеу жоспарланған, - деп хабарлады өңірлік Ауыл шаруашылығы басқармасының басшысы Дархан Дощанов Kazinform тілшісіне.

Еске сала кетейік, Павлодар облысының агроөнеркәсіп кешені бойынша мемлекетке 500 млн теңге шығын келген.