Павлодарлық балалар оқу жылын жаңартылған мектептерде бастайды

ПАВЛОДАР. Қыркүйектің 1-і. ҚазАқпарат /Вера Ливинцова/ - Павлодар облысындағы 415 мектепте бүгін 91 мыңнан астам қала және ауыл балалары партаға отырады. Олардың 8,9 мыңы - мектеп табалдырығын алғаш аттайтын бірінші сыныптықтар.

Барлық білім ошақтары жаңартылды, 120 мектепте бюджеттің есебінен және «Жол картасы» бағдарламасының аясында күрделі жөндеу жұмыстары жасалды. Көптеген мектептерде заманауи жиһаздар орнатылды, жаңа пән кабинеттері жабдықталды.

«Білім күні алғашқы сабақ «Елбасының талпынысы - халық бақыты, Қазақстанның гүлденуі» деген тақырыпқа арналады,- деп хабарлады білім басқармасы бастығының орынбасары Гүлжан Қадырбаева. - Биылғы оқу жылында балабақшалар мен мектептерде, колледждер мен жоғары оқу орындарында жаңа пән - «Өзін-өзі тану» пәні оқытыла бастайды. Бұл пән адамгершілік нормаларын, қарым-қатынастың этномәдени дәстүрлерін, басқа адамдармен ынтымақтастықтың тиімді тәсілдерін игеруге мүмкіндік береді».

Барлық оқушылар оқулықтармен 100 пайызға қамтамасыз етілді, деп хабарлады Г.Қадырбаева. Оларды сатып алуға және жеткізуге бюджеттен 331 миллион теңге бөлінген. 3- және 10-шы сынықтарға арналған барлық оқулықтар толық жаңартылып отыр.

Оған қоса, бүгін сондай-ақ, ауыл және қала мектептеріне жұмыс істеуге барған 300-дей жас маманның мұғалімдік өмір жолы басталады.