Павлодарлықтар Конституция күнін тойлауда

ПАВЛОДАР. Тамыздың 30-ы. ҚазАқпарат /Вера Ливинцова/ - Павлодарда Конституция күнін тойлау «Елбасымен бірге ел қуатын еселейміз!» деп ұрандаған этномәдени бірлестіктер ұжымдарының, студенттер мен оқушылардың және қала тұрғындарының шеруімен басталды. Ал қала орталығында орнатылған үлкен телеэкрандар тұрғындарға барша елмен бірге Астанадағы мерекелік парадты тамашалауға мүмкіндік берді.

Өнер ұжымдары қала тұрғындары мен қонақтарына «Шуағын төккен, алтын Заң» атты үлкен концерттік бағдарлама ұсынды.

Жастар Конституция күнін Ертіс жағалауында тойлап жатыр. Онда «Жігер» және «Болашақ» балалар клубтарының жас әртістері, студенттік еңбек жасақтарының үгіт бригадалары өнер көрсетті, жас суретшілер өз шеберханаларын ашты.

Ал белсенді демалысты жақсы көретіндер «Спорт аллеясына» бет алды. Онда түрлі спорт жарыстары өтіп, спорт мектептерінің оқушылары өз өнерлерін көрсетті, кішкентай балалар үшін ойындар ұйымдастырылды.

Кешке орталық алаңда қазақстандық эстрада жұлдыздарының және жергілікті үздік өнер ұжымдарының қатысуымен «Менің Отаным -Қазақстан» концерті болады. Мерекелік кеш отшашумен аяқталады.