Пентагон мобильді жаңа буын ядролық реакторын сынақтан өткізбек

АСТАНА. KAZINFORM –  Washington Times басылымының хабарлауынша, Пентагон әскери нысандарды сенімді энергиямен қамтамасыз ету үшін жаңа буындағы мобильді ядролық реакторды әуе арқылы жеткізді.

Жексенбі күні америкалық C-17 ұшағы Valar Atomics компаниясының жанармаймен толтырылмаған мобильді реакторын Калифорниядағы March Air Reserve Base резервтік авиабазасынан Юта штатындағы Hill Air Force Base авиабазасына тасымалдады.

Пентагон шағын мобильді реакторларды жергілікті электр желілеріне тәуелсіз, сенімді энергия өндіру үшін пайдалануды жоспарлап отыр. Мұндай желілер қақтығыс кезінде істен шығуы немесе шабуыл нысанасына айналуы мүмкін.

Өткен жылдың мамыр айында Дональд Трамп «ядролық жаңғыру» жоспарларын жариялап, 2050 жылға қарай елдегі электр энергиясын өндіру көлемін төрт есе арттыруды, соның ішінде жалпы қуаты 300 гигаватт болатын жаңа электр станцияларын салуды көздейтінін мәлімдеген. Бір гигаватт қуат шамамен 750 мың үйді электр энергиясымен қамтамасыз ете алады.

Бұған дейін Amazon өзінің алғашқы атом электр станциясының жобасын таныстырғаны хабарланған болатын.