Солтүстік Қазақстан облысы полиция департаменті баспасөз қызметінің мәліметінше, экстремизмге қарсы іс-қимыл басқармасының қызметкерлері жедел іс-шараларды өткізу барысында құқықбұзушылықты анықтады. Ер адам «аватаркасына» орналастырған ту – шетелдік террористік ұйымға тиесілі. Оның қызметі ел аумағында тыйым салынған.
Мамандандырылған әкімшілік соттың шешімімен енді құқық бұзушы 100 АЕК – 370 мың теңге мөлшерінде айыппұл төлейді.
СҚО полиция департаменті экстремизмге қарсы іс-қимыл басқармасының қызметкерлері жақында елге экстремистік мазмұндағы әдебиеттің енуіне жол бермеді. Сондай-ақ интернет арқылы діни материалдарды заңсыз таратудың 5 фактісін анықтады.
Тәртіп сақшылары діни мазмұндағы тыйым салынбаған ақпараттық материалдар мен діни мақсаттағы заттарды тек ғибадат үйлерінде, рухани білім беру ұйымдарында және арнайы белгіленген стационарлық үй-жайларда таратуға рұқсат етілгенін еске салады.