Петропавлда аялдаманың әйнегін шаққан екі мас бойжеткен ұсталды

ПЕТРОПАВЛ. ҚазАқпарат – Петропавлда екі бойжеткен спирттік ішімдік ішіп, көшедегі аялдаманың әйнегін шағып тастады, деп хабарлайды ҚазАқпарат тілшісі.

Петропавл қалалық полиция басқармасының мәліметінше, 1 қыркүйек күні сағат таңғы 5.00 шамасында Петропавл тұрғыны полицияға хабарласып, құрылыс-экономикалық колледждің маңындағы әйнек аялдаманы біреулердің сындырғанын айтқан.

Оқиға орнына жеткен полиция наряды бұзақыларды сол жерде ұстады. Аялдаманың әйнегін шаққандар облыс орталығының тұрғындары - 20 жастағы екі бойжеткен екен. Екеуі де мас болған.

Айтуларынша, екеуінің біреуі осылайша бар ашуын аялдамадан алмақ болыпты.

Осы оқиғаға қатысты әкімшілік құқық бұзушылық туралы 434-бап - «Ұсақ бұзақылық» бойынша материал жиналды. Іс сотқа беріледі.

Бұл бап бойынша 5 АЕК мөлшерiнде айыппұл немесе 10 тәулiкке дейiнгi мерзiмге әкiмшiлiк қамаққа алу жазасы қарастырылған.