Олардың арасында тек Шығыс Қазақстан облысының ғана спортшылары жоқ. Жалпы бұл жолы жарыс алаңына 100-ден астам спортшы шыққан. Олардың ішінде халықаралық жарыстардың жеңімпаздары да бар.
- Бұл чемпионат – тек спорттық бәсеке ғана емес, бұл – халқымыздың сан ғасырлық тарихынан сыр шертетін, ұрпақтан-ұрпаққа жалғасып келе жатқан рухани құндылықтың жалғасы. Асық ойыны – ұлт тәрбиесінің өзегіне айналған, ұлттық сананы қалыптастыратын ерекше мәдени мұра. Бүгінгі іс-шара – салт-дәстүрімізді ұлықтаумен қатар, ұлттық спорт арқылы ел мерейін үстем етіп жүрген саңлақтарымызды таныстыратын күн. Солардың бірі – Сәния Әскер. Ол 2024 жылы Астанада өткен V Дүниежүзілік көшпенділер ойындарында Қазақстан әйелдер құрамасы сапында өнер көрсетіп, алтын жүлдені қанжығасына байлады. Асық ату шебері – Камила Сексембай. Былтыр әлем кубогында топ жарды. Міне, осындай тұлғалар – елдің рухын көтеретін, жас буынға бағыт-бағдар беретін лайықты үлгі, - деді Солтүстік Қазақстан облыстық Дене шынықтыру және спорт басқармасының басшысы Әділхан Сағындықов.
Бұл жарыста СҚО намысын алты спортшы қорғайды, олар: Кенжехан Әкімжанов, Дамир Сүндетов, Қанат Жахин, Сания Әскер, Сабина Ермағанбет және Камила Сексембай.
Чемпионатта СҚО-ның асық атудан аға жаттықтырушысы Ақжан Сұрағановқа «Асық ату спортының қайраткері» медалі табыс етілді.
Бес асық және асық ату ұлттық спорт түрлерінен басталған Қазақстан чемпионаты 13 маусымға дейін жалғасады.
Бұған дейін Қазақстан құрамасы спорттық гимнастикадан Азия чемпионатында 3 медаль жеңіп алғанын жазған едік.