Көрмеге келушілер 20-дан астам құранды және өзге де көне жәдігерлерді тамашалай алады.
— Абылайхан резиденциясы музей кешенінің ұйымдастыруымен филиал — Ислам мәдениеті музейінде көрме өтіп жатыр. Биыл бұл музейдің ашылғанына екі жыл. Осы аралықта 30-дан астам құран жиналды. Соның ең көне дегендерін бүгін шығарып, келушілерге таныстырып жатырмыз. Мақсатымыз — дінге шақыру емес, құранның пайда болу тарихын, жазбалардың қаншалықты маңызды екенін көрсету, — дейді Абылайхан резиденциясы музей кешені директорының орынбасары Әсемгүл Қыдбекова.
Соның бірі — беті сарғайғанымен құндылығын жоғалтпай, 134 жыл бұрын баспадан шыққан құран кітабы.
— Құран төрт баспамен шыққан, бірінші араб баспасы, екіншісі — Пәкістан баспасы, түрік және татар баспасы. Қазір музейімізде осы татар баспасының бірінші басылымда шыққан нұсқасы сақталған. Бұл кітап 1881 жылы шыққан. Құранның барлығы бір мағынада шыққан. Бұл құрандарды бізге тұрғындар әкеліп тапсырып жатыр. Сандықта жатқан, ата-бабасынан қалған, соны музейге тегін сыйлады. Оларды біз осылайша жұрт назарына ұсынамыз және оқып отырамыз, — дейді Ислам мәдениеті музейінің директоры Мұрат Әміржанов.
Көрмеден 1893, 1910, 1907 жылғы көне құрандарды да көруге болады. Ал мына тасбих 19 ғасырда қыштан жасалған екен.
— Тасбих 99 тастан тұрады. Неліктен? Алланың 99 есіміне байланысты. Мына жәдігерді Ирактың Бағдад қаласына жарылғыш заттарды залалсыздандыру жұмысымен біздің Петропавлдан барған жігіт тапсырды. Ол мешітте жұмыс істеп жүріп, үйінділердің астынан тапқан екен. Соған риза болып, мешіттің имамы сыйлыққа берген. Бұл тасбихта Ясин сүресі жазылған. Бұрын сүрелер ағаштың қабығына, терілерге, қышқа жазылған. Көпшілік Ясин сүресін үйді тазалауға, ауру-сырқаудан арылуға, тіл-көзден сақтану үшін пайдаланады, — дейді Мұрат Әміржанов.
Алтын орда дәуіріне жататын Қызыл оба қорымынан табылған жәдігерлерді де тамашалауға болады.
Петропавлда Ислам мәдениеті музейі 2023 жылы күзде ашылды.
Ғимараттың өз тарихы бар, ол 1857 жылы мешіт ретінде салынып, кейін жергілікті зауыттың қоймасы ретінде пайдаланып келді.
Күрделі жөндеу барысында нысанның өзіндік ерекшелігі сақталып қалды.
Бұған дейін Сырымбеттегі Шоқан музейі және ғалымның балалық шағы өткен Айғаным қонысы жайлы жазған едік.