21:01, 27 Ақпан 2024

Петропавлда волейболдан ел чемпионатының төртінші туры мәресіне жетті

ПЕТРОПАВЛ. KAZINFORM — Петропавл қаласында волейболдан әйелдердің Ұлттық лига командалары арасында ХХХІІ ҚР чемпионатының төртінші тур ойындары аяқталды.

Фото: Қазақстан волейбол федерациясы

Соңғы күні орталық матчта Өскеменнің «Берелі» Түркістанның «Тұранын» 3:0 (25:17, 25:23, 25:22) есебімен жеңіп, қорытынды кестеде 56 ұпаймен екінші орынға ие болды.

Түркістандықтар төртінші сатыда қалды.

«Қарағандыны» күткендегідей, 3:0 (26:24, 25:15, 25:21) есебімен қапы қалдырған «Қуаныш» (СҚО) 63 ұпаймен көш бастады.

«Жетісу» тағы бір талдықорғандық «Айқаракөз» клубын 3:0 (25:7, 25:17, 25:17) ұтып, 53 ұпаймен үздік үштікке ілікті. 

Фото: Қазақстан волейбол федерациясы

Бесінші орындағы «Алматы» Өскеменнің «Алтайынан» 3:0 (25:15, 25:9, 25:11) есебімен басым түсті.

Осылайша «Айқаркөзден» басқа үздік сегіз команданың плей-офф кезеңінде өзара кімдермен кездесетіні белгілі болды.

Атап айтқанда, «Қуаныш» 8-орын алған «Алтаймен», «Берел» «Қарағандымен», «Жетісу» Павлодардың «Ертісімен», «Тұран» «Алматымен» күш сынасады.

Плей-офф бәсекелері Түркістан қаласында өтіп, чемпионаттың жеңімпаз-жүлдегерлері анықталады.

Фото: Қазақстан волейбол федерациясы

Еске сала кетейік, бұдан бұрын волейболдан ел чемпионатының плей-офф сатысына шыққандар анықталғанын жазған болатынбыз.

Волейбол Петропавл Спорт
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).