Петропавлдағы жеткіншектер үйі биыл 72 млн теңгеге жөнделді
ПЕТРОПАВЛ. KAZINFORM — Петропавлдағы жеткіншектер үйі 20 жылдан астам уақыт ішінде жетім және ата-анасының қамқорлығынсыз қалған 700-ден астам бозбала мен бойжеткенге пана болып, өмірге бейімдеді. Қазіргі уақытта бұл үйде 24 адам тұрып жатыр.
Балалар үйлері мен отбасылық үлгідегі балалар ауылының түлектері үлкен өмірге аяқ баспас бұрын жеткіншектер үйіне орналасады. Петропавлдағы 2001 жылы ашылған ерекше мекеме арқылы осы уақыт аралығында 727 бозбала мен бойжеткен өткен.
Мекеме директоры Жұқаш Қосыбаевтың айтуынша, жеткіншектер үйі 52 тәрбиеленушіге арналған. Ғимаратта 20 бір бөлмелі және 4 екі бөлмелі пәтер бар.
«Барлық пәтер тұрмысқа қажет жиһазбен толық қамтылған. Ас бөлмесінде электр пеші, тоңазытқыш, шкаф, үстел-орындықтар бар. Санитарлық бөлме біріктірілген, тұрмыстық бөлме кір жуатын машиналармен қамтылған. Жастарға ыңғайлы болуы үшін бар жағдай жасалған», — дейді Жұқаш Қосыбаев.
Жеткіншектер үйінде 18 бен 23 жас аралығындағы бойжеткен-бозбалалар тұра алады. Мекеменің мақсаты — балалар үйінен шыққан жасты әлеуметтендіру, өздігінен өмір сүре алатындай етіп бейімдеу. Ал оларға осындағы педагогтар мен мекеме қызметкерлері жол көрсетіп, ақыл-кеңес береді.
«Балаларды тәрбиелеу мен оқытуды мемлекет толықтай өз мойнына алған. Әкімшілік тарапынан тәрбиеленушілерге, оның ішінде бұрынғы тәрбиеленушілерге де тұрғын үй, еңбек, әкімшілік құқық мәселелері бойынша заңгерлік консультациялық көмек көрсетіледі. Ал қоғамға, өмірге бейімдеуде, тұрмыста қажетті дағдыларды меңгеруде педагогтар көмектесіп, күнделікті жұмыс атқарады. Балалардың барлығы мемлекеттік шәкіртақы алады, тамақтануға жәрдемақы беріледі. Тәрбиеленушілердің бір бөлігі асыраушысынан айрылуына байланысты әлеуметтік көмек алады», — дейді мекеме директоры.
Қазіргі уақытта жеткіншектер үйінде 11 бозбала және 13 бойжеткен тұрып жатыр. Олардың төртеуі жергілікті университетте, бесеуі колледждерде оқыса, қалғаны жұмыс істейді.
«Былтыр Жеткіншектер үйінің материалдық-техникалық базасын нығайтуға 35 млн теңгеге жуық қаражат бөлінді. Ол қаражатқа жиһазды, тұрмыстық техниканы, перделерді жаңаладық. Бейнебақылау жүйесін ауыстырдық. Биыл 72,5 млн теңге шамасында бөлінді. Ол ақшаға бөлмелерге ағымдағы жөндеу жүргізілді, санитарлық бөлмелер жөнге келтірілді», — дейді Жұқаш Қосыбаев.
Жастар мемлекеттік тұрғын үй қорынан баспана алуға кезекте тұр. Жиырма жылдан астам уақыт ішінде мекеменің тек 97-і тәрбиеленушісі Петропавлдан жалдамалы-коммуналды пәтерге қол жеткізген. Тағы тоғызы облыстың аудандарынан баспаналы болды.
Бұған дейін СҚО-да ауыл тұрғынынан 500 литрге жуық спирттік өнім тәркіленгенін жазған едік.