ОРАЛ. ҚазАқпарат - Орал қалалық сотының үкімімен 23 жасар В.Шуравлев ҚР ҚК 293-бабы 2-бөлімі 2-тармағы, 379-бабы 1-бөлімі, 380-бабы 1-бөліміне сәйкес айыпты деп танылып, оның 2 жылға бас бостандығы шектелді, деп хабарлайды «ҚазАқпарат» тілшісі.
БҚО прокуратурасының баспасөз қызметінен түскен мәліметке қарағанда, одан сондай-ақ 229 514 теңге процессуальдық шығын өндірілді.
Сот талқысында белгілі болғанындай, В.Шуравлев 2016 жылы 17 желтоқсан күні арақ ішкен күйінде «Узбечка» дәмханасында отырғандарға тиісіп, балағаттаған. Ыдыс-аяқты сындырып, орындықты лақтырған ол барда тұрған қыздың кеуде тұсынан ұрған. Полиция бөліміне жеткізілгеннен кейін билік өкілдеріне тіл тигізгенімен қоймай, баспен соғып, бір қызметкердің мұрнын бұзған.
Сотталушы өз кінәсін толық мойындады.
Сот үкімі заңды күшіне енді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).