Бұл туралы кеше Алматыда өтіп жатқан «Software Engineering Summit-2010 Қазақстан» форумында айтылды, деп хабарлайды ҚазАқпарат.
«Пошта қызметі саласындағы кәсіпорындардың кірісі 2010-2014 жылдары жыл сайын 15 пайызға артады. Оған экономикалық өсім түрткі болады. Ондағы негізгі жеткізушілер пошта қызметінде - Қазпошта, курьерлік қызметте - Қазпошта, DHL, UPS және басқалар, 10 келіден асатын ірі көлемдегі тасымалда - Pony, DHL, ҚТЖ, Қазпошта, мерзімді басылымдарда жеткізуде - Қазпошта, Қазпресс, Еуразия және басқалар», дейді Индустрия және жаңа технологиялар министрлігінің Дамушы салалар департаментінің жоғары технология саласы басқармасының бастығы Бақытжан Битеміров. Оның айтуынша, өсімдегі кедергі пошта қызметінде ауылдағы поштаның шығындылығы болса, өзге қызмет түрлерінде экономиканың жағдайы болып отыр.