АСТАНА. KAZINFORM — Қазақстандықтар Аружан Сағындықова мен Екатерина Дмитриченко жұптық сында Астанада Президент кубогы үшін өтіп жатқан ITF W15 турнирінің финалына шықты.
Қазақстандық жұп жартылай финалда өзбекстандықтар Нигина Алимова — Сабрина Олимжановамен шеберлік байқасты.
Бірінші партияны өзбекстандықтар өз есебіне жазды — 7:5. Екіншісінде Аружан мен Екатерина қарымта қайырды — 7:5. Содан кейін супер тай-брейкте жеңісті жұлып алды — 10:5.
Қазақстандық дуэт финалда ресейлік Екатерина Хайрутдинова — белоруссиялық Анна Кубаревамен чемпиондық атақты сарапқа салады.
Тағы бір қазақстандық Асылжан Арыстанбекова жекелей сында ширек финалда рейтингіде 882-орындағы ресейлік Виктория Миловановаға есе жіберді — 4:6, 1:6.
Еске сала кетейік, бұдан бұрын Цинциннати турнирінде Елена Рыбакинаның әлемнің 6-ракеткасын жеңіп, ширек финалға шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).