"Мемлекетіміздің тікелей қолдауы мен қамқорлығының арқасында елімізде дене шынықтыру және спорт дамуының барлық мүмкіншілігі жасалған. Бұл сала бүгінгі таңда маңызды әлеуметтік-экономикалық сала ретінде аяғынан нық тұрды деп айтуға болады. Осы сөзімнің айқын дәлелі - Елбасы Нұрсұлтан Назарбаевтың бастамасымен салынған бүгінгі күні есігін бірінші рет айқара ашып отырған "Жекпе-жек" сарайы. Құтты болсын!", - деді фестивальдің ашылу рәсімінде сөз сөйлеген ҚР Мәдениет және спорт министрі Ақтоты Райымқұлова. Министр Қазақстанның жауынгерлік өнер қауымдастығы еліміздің өңірлерінде жауынгерлік өнер фестивалін өткізгенін айтты.
"Жобаның басты мақсаты - өскелең ұрпақ арасында салауатты өмір салтын насихаттау. Бүгінгі кеште Жауынгерлік өнер қауымдастығының құрамына кіретін жекпе-жек спортының 21 түрінен спортшыларымыздың өнерін тамашалаймыз", - деді ол.
Шара аясында кәсіби және әуеқой жекпе-жектер ұйымдастырылып, жарық шоуы болып жатыр. Каратэ, таэквонда, ММА, грэпплинг және басқа жекпе-жек түрлері бойынша спорттық машықтар көрсетілуде.
Айта кетерлігі, фестиваль 2019 жылдың мамыр айында Шымкент қаласында басталып, еліміздің барлық өңірлерінде өткізілген еді.