Приозерск қаласында «Ақ бұлақ» бағдарламасы бойынша жаңа су тазарту кешені салынды
Облыс әкімі Елбасының Қазақстан халқына арнаған Жолдауында алға қойған тапсырмаларының орындалуы бойынша жергілікті билік органдарының жұмысымен танысты. Бағдарламада бірнеше нысанды аралау көзделді.
Өңір басшысы Приозерскіде «Ақ бұлақ» мемлекеттік бағдарламасы бойынша салынған жаңа су тазарту кешеннің іске қосылуымен танысты.
«Тұрғындарды таза ауыз сумен қамту - ел Президенті Нұрсұлтан Назарбаевтың жергілікті билік органдары алдына қойған тапсырмаларының бірі. Жаңа кешеннің құрылуы бұл тапсырманы орындауға септесетін болады. Жоба құны 1 млрд. теңгеден асады. Оны жүзеге асыру құрылысшылар мен монтаждаушылардың, өзге мамандық иелерінің кәсіби біліктілігінің жоғары болуын талап етті», - деді Н. Әбдібеков.
Суды тазарту жүйесінің сапасы жоғары екені аталып өтілді. Мұны санитарлық-эпидемиологиялық сараптама растады.
«Суды тазарту үшін «Grundfos» және «Siеmens» маркалы қондырғылар пайдаланылады, ультрафильтрлеу мен суды айдау жүйесі қолданылады», - делінген хабарламада.
Сондай-ақ Приозерскіде 6,6 шақырым су құбыры желісі салынып, жеке сектордағы үйлерде есептеу құрылғылары орнатылды.
Жұмыс сапары кезінде облыс әкімі «Ер-тай» ЖШС жұмысымен танысты. 2010 жылы ашылған кәсіпорын түсті металдарды өндіру және өңдеумен айналысады.
«Мұнда оң нәтижелер байқалып отыр. Егер 2013 жылы өндірілген құрамында алтыны бар және қорғасын концентраттарының көлемі 10,8 мың тоннаны құраса, 2014 жылы - 21,2 мың тоннаны құрады, ал инвестициялар бұл мерзімде 15 млн. теңгеден 17,2 млн. теңгеге дейін ұлғайды», - делінген хабарламада.
Сонымен қатар аймақ басшысы ҚР Қорғаныс министрлігінің әскери техникаға арнап салып жатқан парк алаңын көрді.
Кейін Н.Әбдібеков түрлі санаттағы азаматтарға пәтер кілттерін тапсыру рәсіміне қатысты. Жаңа қонысын әлеуметтік сала қызметкерлері, зейнеткерлер тойлады. Сонымен бірге үйлері апаттық жағдайда деп танылған қала тұрғындарына жаңа үйлер берілді.
Жұмыс сапарының қорытындысы бойынша облыс басшысы Приозерск басшылығына қаланың әлеуметтік-экономикалық дамуына байланысты бірқатар тапсырмалар жүктеді.
2015 жылдың I тоқсанында Приозерск кәсіпорындарындағы өнеркәсіптік өнім көлемі 940 млн. теңгені құрады, бұл өткен жылдың сәйкес мерзімінен 15%-ға артық. Қалада 641 шағын және орта бизнес субъектісі жұмыс істейді, олардың өсімі 8,6% құрайды.