ОРАЛ. ҚазАқпарат - Прокурорлық қадағалау актісіне сәйкес Ақсай қаласының әкімі Айымгүл Тіріжанова қызметінен босатылды, деп хабарлайды ҚазАқпарат тілшісі.
БҚО прокуратурасының баспасөз қызметінен түскен мәліметке қарағанда, А.Тіріжанованың биылғы 14 қыркүйекте аталмыш қызметке арнайы тексерусіз, заңсыз тағайындалғаны белгілі болды.
А.Тіріжанова бұдан бұрын Бөрлі аудандық білім беру бөлімінің басшысы қызметін атқарған кезде сыбайлас жемқорлық құқықбұзушылығын жасағаны үшін әкімшілік жауапкершілікке тартылған. Атап айтқанда, Бөрлі аудандық мамандандырылған әкімшілік сотының 2015 жылғы 27 наурыздағы қаулысымен А.Тіріжанова ҚР Әкімшілік құқықбұзушылық кодексінің 535-бабына (заңсыз кәсіпкерлік қызметпен айналысу және заңсыз табыс табу) сәйкес айыпты деп танылып, оған 792,8 мың теңге айыппұл салынған.
Қолданыстағы заңнамаға сәйкес мемлекеттік қызметке қабылданғанға дейін үш жыл мерзімде сыбайлас жемқорлық құқықбұзушылығын жасағаны үшін сот тәртібімен әкімшілік айыппұл салынған азамат мұндай қызметке қабылдана алмайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).