АСТАНА. KAZINFORM – Қазақстанның екінші, әлемнің 27-ракеткасы Юлия Путинцева Ноттингем (Ұлыбритания) WTA 250 турнирінің екінші айналымына жолдама алды.
Жарыстың 4-ракеткасы болып тіркелген қазақстандық теннисші бастапқы кездесуін дүниежүзілік рейтингіде 577-орында тұрған британиялық, 16 жастағы Ханна Клагменмен өткізді.
Екі сетте де 6:2 есебі тіркелді.
Бір сағат 10 минутқа созылған бәсекеде Путинцева 1 эйспен бірге 7 брейк-пойнттың алтауын мүлт жіберген жоқ. Клагмен 2 брейкпен көзге түсті.
Юлия Путинцева ширек финалға шығу үшін әлемнің 38-ракеткасы, словакиялық Ребекка Шрамкова немесе рейтингіде 106-сатыдағы германиялық Лаура Зигемундтың қай жеңгенімен таласады.
Жүлде қоры 275 мыңнан астам долларға бағаланған Ноттингем додасы 22 маусымда мәресіне жетеді.
Өткен жылы Ю.Путинцева бұл турнирге қатыспаған еді.
Еске сала кетейік, бұдан бұрын 17 жасар Әмір Омархановтың әлемдік рейтингіде үздік көрсеткішке қол жеткізгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).