PWL турнирі: Азамат Дәулетбеков қарсыласынан басым түсті

АСТАНА. KAZINFORM — Бүгін Алатау етегінде әлемнің ең әйгілі балуандарының басын қосқан PWL турнирінде еркін күрестен әлем чемпионатының 2 дүркін қола жүлдегері, 3 дүркін Азия чемпионы Азамат Дәулетбеков қарсыласынан басым түсті.

PWL турнирде ол Олимпиаданың күміс жүлдегері, Беларусь елінің намысын қорғап жүрген дағыстандық Хадимагомедов Магомедхабибпен белдесіп, 4:0 есебімен жеңіске жетті.

Отандасымыз осымен үшінші рет PWL турниріне күресіп отыр. Бұған дейін аталған турнирге екі рет қатысып, алғашқысында қарсыласына жол берсе, екінші рет жеңіске жеткен болатын. Міне, үшінші рет тағы да жарысты жеңіспен аяқтады.

Сонымен қатар аталған сында әйелдер күресінен Жәмила Бақбергенова сынға түскен болатын. Өкінішке қарай, отандасымыз қырғызстандық әйгілі балуан Айпері Медетқызына 5:1 есебімен жол берді.

Енді санаулы сәттерден кейін PWL турнирінің басты айқасы деп саналған Ризабек Айтмұқан мен американың әйгілі балуаны, Олимпиада чемпионы Кайл Снейдер арасындағы белдесулер өтеді. 

Бұл жекпе-жек жанкүйерлер үшін ерекше қызықты болары анық. Себебі Ризабек — жас болса да, әлемдік аренада өзін дәлелдеп үлгерген балуан.

Ол 2023 жылы Белградта өткен әлем чемпионатында алтын медаль жеңіп алып, қазақ күресінің тарихына есімін алтын әріппен жазды. Өзінің физикалық қуаты мен техникалық шеберлігінің арқасында Айтмұхан алдағы белдесуде лайықты қарсылас болатыны сөзсіз.

Осыған дейін Ризабек Айтмұқан әйгілі балуан Кайл Снайдермен белдесетіні туралы жазған болатынбыз.