Ірі мұнай танкерлері Ормуз бұғазын айналып өту үшін бағытын өзгертіп жатыр

АСТАНА. KAZINFORM – Әрқайсысы шамамен 2 миллион баррель шикі мұнай тасымалдауға қабілетті екі супертанкер Ормуз бұғазында бағытын күрт өзгертіп, АҚШ-тың Иранға жасаған әуе шабуылдарынан кейін Парсы шығанағындағы кеме қатынасы тәуекелге ұшыраған соң, олардың біреуі ғана бұғазға қайта оралды.

AZERTAC агенттігінің хабарлауынша, Гонконгта тіркелген Coswisdom Lake кемесі мен АҚШ-та тіркелген South Loyalty танкері жексенбі күні Ормуз бұғазына кіріп, кейін күрт бағытын өзгерткен. Бұл туралы Bloomberg агенттігі кеме қозғалысын бақылау деректеріне сілтеме жасап хабарлады. Бірінші кеме екінші рет бағытын өзгертіп, енді Ормуз бұғазы арқылы қайта артқа бет алған. Ал екінші кеме дүйсенбідегі сигналдарына сәйкес, әлі де Парсы шығанағына кірмеген.

13 маусымдағы Израильдің әуе соққыларынан кейін Парсы шығанағындағы кемелердің электроникасы мен навигациялық сигналдарына жиі кедергілер жасалуда.

Электрондық кедергілер мен кемелердің Иран жағалауынан аулақ болуға тырысуына қарамастан, АҚШ шабуылдарынан кейін мұнай және газ танкерлері Ормуз бұғазы арқылы өтіп жатыр. Бағытын өзгерткен танкерлер ықтимал маршрут өзгерісінің алғашқы белгісі ретінде қарастырылып жатыр.

Кеме иелері мен мұнай саудагерлері Таяу Шығыстағы шиеленістің мұнай тасымалына әсер етуі мүмкін кез келген белгіні мұқият қадағалап отыр.

Жексенбі күні Грекияның Кеме қатынасы министрлігі өз елінің кеме иелеріне Ормуз бұғазы арқылы жүру жоспарларын қайта қарауды және жағдай тұрақталғанға дейін қауіпсіз порттарда тұрақтауды ұсынған хабарлама жариялады.

Bloomberg сарапшылары Ормуз бұғазының жабылуы — бұрын-соңды болмаған қадам — жаһандық мұнай және экономикалық дағдарысқа алып келуі мүмкін екенін ескертеді. Мұның салдарын тұтынушылар жанармай құю бекеттеріне барған сәттен бастап сезе бастайды.

Ең төтенше сценарий — Ормуз бұғазының толық жабылуы. Бұл тар теңіз өткелі Парсы шығанағын Оман шығанағы және Үнді мұхитымен байланыстырады. Дүниежүзілік мұнай саудасының 20%-ы және теңіз арқылы тасымалданатын мұнайдың 35%-ы дәл осы бұғаз арқылы өтеді. Бұғаздың жабылуы Brent маркалы мұнайдың бағасын 130 доллардан асыруы мүмкін, бұл Еуропа үшін эталон болып табылады және бұл жағдай бірден жаһандық инфляцияға әсер етеді.

Айта кетелік  Иран парламенті Ормуз бұғазын жабуды ұсынған еді.