АСТАНА. KAZINFORM – Футболдан Қазақстан ұлттық құрамасының жартылай қорғаушысы Рамазан Оразов Семейдің «Елімай» командасына ауысты. Бұл жөнінде семейлік клубтың баспасөз қызметі мәлім етті.
– Рамазан Оразов даниялық «Силькеборг» клубынан семейлік «Елімай» сапына еркін агент ретінде ауысқанын ресми хабарлаймыз. Мансабының маңызды бөлігін еліміздің беделді клубтарында өткізген ойыншы «қазақтың Модричі» лақап атымен кеңінен танымал. Словения мен Дания біріншілігінде ойнау тәжірибесі бар ойыншыға туған еліне қош келдің дейміз, - деп жазылған хабарламада.
Рамазан Оразов 1998 жылы 30 қаңтарда Алматы қаласында дүниеге келген. Қазірге дейін еліміздің «Қайрат», «Ақтөбе», «Ақсу», «Тобыл», Латвияның «Даугавпилс» және Ресейдің «Чайка», Словенияның «Копер» клубтарында ойнады.
Еске салсақ, бұдан бұрын қазақстандық футболшы Ғалымжан Кенжебек семейлік «Елімай» командасына ауысқан болатын.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.