«Реал Мадрид» Орталық стадионда жаттығу өткізді
АЛМАТЫ. KAZINFORM – УЕФА рейтингінде көш бастап тұрған «Реал Мадрид» клубының ойыншылары Алматының Орталық стадионында жаттығу жасады.
Футболшылар алдымен алаңды бірнеше айнала жүгіріп өтіп, одан кейін қыздырыну және созылу жаттығуларына кірісті. Кейін «Реал Мадрид» ойыншылары үш топқа бөлініп, доппен жұмыс істеді.
Жаттығу алдында өткен баспасөз мәслихатында испаниялық клуб ойыншысы Федерико Вальверде Алматы мен жанкүйерлер жайлы алғашқы әсерімен бөлісті.
- Қазақстанда осыншама «Реал Мадрид» жанкүйерін көргеніме қуаныштымын. Әрине, біз үшін мұндай қолдау үйреншікті жағдай. Бірақ түнгі уақытта әуежайда көптеген адамдардың қарсы алуы – қуантарлық жайт. Футболдағы ең жағымды сәт – Испаниядан осыншалықты алыс елде де қолдау табамыз, – деді Вальверде.
УЕФА Чемпиондар лигасының топтық кезеңі аясында «Қайрат» пен «Реал Мадрид» арасындағы ойын 30 қыркүйек күні сағат 21:45-те Орталық стадионда өтеді.
Еске салайық, бұған дейін «Реал Мадрид» футбол клубының бас бапкері Хаби Алонсо «Қайратқа» қарсы өтетін ойынға қатысты пікір білдірді.