Ресей әуе компанияларының шығыны 20 млрд рубльге жетуі мүмкін

МӘСКЕУ. KAZINFORM — Ресей әуежайлары ұшқышсыз ұшу аппараттарының шабуылдарына байланысты енгізілген қауіпсіздік шаралары мен қолайсыз ауа райына байланысты туындаған ірі көлік дағдарысынан кейін біртіндеп қалыпты жұмыс тәртібіне оралып жатыр, деп хабарлайды Kazinform агенттігінің тілшісі.

Ресей Көлік министрлігінің мәліметінше, 5 шілдеде Шереметьево, Пулково және Стригино (Төменгі Новгород) әуежайларында 250-ден астам рейс тоқтатылып, 270-тен астамы кешіктірілген. 6 шілде күні сағат 18:00–дегі жағдай бойынша, Шереметьевода — 171, Пулковода — 90, Стригинода — 26 рейс тоқтатылып, тиісінше 56, 37 және 13 рейс екі сағаттан артық кешіккен.

Жалпы есеппен 480 рейс тоқтатылып, кешіктірілген. Бұл шара бүкіл ел бойынша жүздеген мың жолаушыға әсер етті.

Авиақызмет өкілдерінің мәліметінше, 88 ұшақ басқа әуежайларға бағытталған, 43 мың рейс бойынша билеттер қайтарылған, ал 94 мың жолаушы уақытша қонақ үйлерге орналастырылған. Жолаушыларға 199 мың сусын талоны мен 155 мың азық-түлік талоны таратылған.

Қазіргі уақытта барлық ресейлік әуежай қалыпты жұмысын жалғастырып жатыр. Көлік министрлігі бұл шектеу шаралары тек азаматтық әуе рейстерінің қауіпсіздігін қамтамасыз ету үшін енгізілгенін және ол қауіптің алдын алуға бағытталған мәжбүрлі шешім екенін мәлімдеді.

Жалпы алғанда, сарапшылардың есебі бойынша, бұл жағдайдан Ресейдің әуе компанияларына келтіретін шығын 20 миллиард рубльден (шамамен 132 миллиард теңгеден) асуы мүмкін. Бұған билет ақшасын қайтару, жолаушыларға өтемақы төлеу, экипаждарды орналастыру және ұшақтарды техникалық қамтамасыз ету шығындары кіреді.

Көлік саласындағы бұл жағдай 5 шілдедегі дрон шабуылдарымен байланысты. Олар Ресейдің 15 аймағында, соның ішінде ірі көлік тораптарының маңында, тіркелген.

Осы жағдайға байланысты тұрғындар теміржол билеттерін сатып ала бастаған. Бұл ретте «Ресей темір жолдары» компаниясы қосымша пойыздар шығарды.

Осы ахуал аясында бүгін Ресей Президенті РФ Көлік министрі Роман Старовойтты қызметінен босатты. Ол бұл лауазымға былтыр мамырда тағайындалған.

Бұған дейін Измир әуежайы жұмысын уақытша тоқтатқаны туралы  хабарлағанбыз.