Ресей төрт африкалық елмен визалық режимді жеңілдетуді қарастыруда

АСТАНА. KAZINFORM – Ресей Замбия, Зимбабве, Мозамбик және Эсватинимен визалық режимді жеңілдету бойынша келіссөздер жүргізіп жатыр. Сонымен бірге Мәскеу Ресейге электрондық виза алуға рұқсат етілген африкалық елдер тізімін кеңейтуді де жоспарлап отыр, деп хабарлайды ТАСС.

РФ Сыртқы істер министрлігінің Африка мемлекеттері (Сахарадан оңтүстікке қарай) департаментінің директоры Анатолий Башкиннің айтуынша, қазіргі уақытта аталған төрт елмен тиісті келісімдер пысықталуда.

«Құжаттардың жобалары шетелдік әріптестерге жолданып, олардың қарауында», – деді ол «Африканская инициатива» басылымына берген сұхбатында.

Дипломат сондай-ақ Зимбабве, Кения және Эсватини азаматтарына Ресейге электрондық виза рәсімдеуге рұқсат берілгенін атап өтті.

Оның айтуынша, бұл тізімге болашақта басқа да африкалық мемлекеттер қосылуы мүмкін.

Айта кетейік, Ресейде заңсыз жүрген шетелдіктерге мәртебесін заңдастыру үшін бір ай қалды.