Ресейді әбігерге салған дрондар Қазақстан аумағынан ұшырылды ма – СІМ жауабы
17:00, 23 Маусым 2025
АСТАНА. KAZINFORM – Сыртқы істер министрлігінің ресми өкілі Айбек Смадияров Ресейді әбігерге салған пилотсыз ұшатын аппараттар Қазақстан аумағынан ұшырылды дегенге саятын алып-қашпа әңгімелерге жауап берді.
– Қазақстан аумағынан Ресейге қарай пилотсыз ұшатын аппараттар жіберіліп жатқаны туралы мәліметтер шындыққа жанаспайды, - деді ол кезекті брифингіде.
Айбек Смадияров мұндай оқиғалардың бәрі құзыретті органдардың жіті бақылауында екенін еске салды.
– Бұл жерде техникалық сипаттағы мәселелер бойынша Қорғаныс министрлігіне жүгіну керек, - деді СІМ ресми өкілі.
Бұған дейін Премьер-министрдің орынбасары – Ұлттық экономика министрі Серік Жұманғарин Иран-Израиль текетіресінің Қазақстанның сыртқы саудасына қалай әсер етіп жатқанын айтқан болатын.