ОРАЛ. ҚазАқпарат - 8 қараша күні ҚР АШМ Агроөнеркәсіптік кешендегі мемлекеттік инспекция комитеті БҚО өсімдіктер карантині жөніндегі мемлекеттік инспекторлары Ресейдің Нижегород облысынан Оралға автокөлікпен әкелінген салмағы 20 тонна картопты тексеріп қарады, деп хабарлайды «ҚазАқпарат» тілшісі.
ҚР АШМ баспасөз қызметінен түскен мәліметке қарағанда, тексеру нәтижесінде картоптың алтын түстес жұмыр құртпен зақымданғаны анықталды. Бұл дерек 2017 жылғы 6 қарашадағы №220 карантиндік фитосанитариялық сараптама қорытындысымен расталды.
Қазақстан Республикасы және Еуразиялық экономикалық одағының өсімдіктер карантині саласындағы заңнамасына сәйкес зақымдалған картоп РФ аумағына кері қайтарылды.
Айта кетейік, картоптың алтын түстес жұмыр құрты өсімдіктерді жарамсыз күйге түсіріп, өнім шығынының 20-80 пайызға дейін жетуіне әкеледі. Оған қоса топырақта 10 жылға дейін сақталып, жарамды картоп алқабының қысқаруына соқтыруы ықтимал.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).