Республикалық жас журналистер мен карикатурашылар байқауының жеңімпаздары марапатталды
Байқау 2011 жылдың 9 маусымында «Нұр Астана» газеті мен Астана қаласы жастарды қолдау мемлекеттік қорының бастамасымен басталған еді. Бүгін олардың ішінде ең үздік жұмыстарды ұсынған байқаудың жеңімпаздары мен жүлдегерлері қор тарапынан қомақты ақшалай сыйлықтарға ие болды.
Астана қаласы жастарды қолдау мемлекеттік қорының директоры Аманбек Төлепбергеннің айтуынша, байқау журналистика саласындағы жас тілшілер мен суретшілерді қолдау, олардың шығармашылық табыстары мен талаптарын ынталандыру мақсатында өткізілді.
"Жастардың байқауға қатысу белсенділігі жоғары болды. Додаға 60-тан аса журналист, 20-ға жуық жас карикатурашы атсалысты", - дейді А. Төлепберген.
Оның айтуынша, қор байқауға қатысқан және басқа салада да белсенділік танытып жүрген жастардың қадамын әрқашан қолдауға дайын.
«Сіздерге шығармашылық табыс тілейміз! Тәуелсіздігіміздің тұғырын нық ұстайтын жастарымыз жасай берсін», - деді қор директоры.