ПАРИЖ. KAZINFORM – 17 жастағы қазақстандық тениисші Әмір Омарханов жұптық сында жасөспірімдер арасында Ролан Гаррос турнирінің ширек финалына шықты.
Қазақстандық жас теннисші ресейлік Тимофей Дерепаскомен бірге екінші айналымда жарыстың 5-ракеткалары, франциялық Чарли Камю – аустралиялық Хайден Джонспен сынға түсті.
Тартысқа толы бірінші партия тай-брейкке дейін созылып, қазақстандық-ресейлік жұп шешуші сәтте жеңіске жетті – 7:6 (7:4). Екінші сетте Омарханов – Дерепаско үш брейк жасап, матчты жеңіспен тәмамдады – 6:2. Ойын 1 сағат 15 минутқа созылды.
Әмір Омарханов – Тимофей Дерепасконың ширек финалдағы қарсыластары кейін анықталады.
Бүгін Парижде Қазақстанның бірінші, әлемнің 4-ракеткасы Елена Рыбакина дүниежүзілік рейтингіде 15-орындағы италиялық Ясмине Паолинимен жартылай финал жолдамасы үшін таласады. Бәсеке Астана уақытымен сағат 17.15-ке белгіленген.
Еске сала кетейік, бұдан бұрын Бейбіт Жұқаевтың Ұлыбританиядағы доданы жеңіспен бастағанын жазған болатынбыз. Сондай-ақ Жібек Құламбаева Италиядағы жарыстың жартылай финалына өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).