АСТАНА. KAZINFORM — Қазақстанның екінші, әлемнің 97-ракеткасы Александр Шевченко Ролан Гаррос турнирінің іріктеу сайысын жеңіспен бастады.
Қазақстандық теннисші іріктеу додасының ширек финалында рейтингіде 157-орындағы жапониялық Шинтаро Мочизукиді камбэкпен тізе бүктірді.
Бірінші партияда жапониялық теннисші тай-брейкте сәтті ойнады — 7:6 (7:2).
Бұдан кейін Шевченко ойын тізгінін қолға ала білді — 6:2, 6:4.
Екі сағат 27 минутқа созылған тартысты бәсеке барысында А.Шевченко 5 эйспен бірге 13 брейк-пойнттың жетеуін пайдаланды. Мочизуки 2 эйс, 4 брейкпен (6 брейк-пойнт) шектелді.
Александр Шевченко іріктеу сайысының жартылай финалында рейтингіде 268-сатыдағы франциялық Матис Эрхардпен шеберлік таластырады.
Тағы бір қазақстандық, әлемнің 230-ракеткасы Бейбіт Жұқаев рейтингіде өзінен үш саты жоғары тұрған америкалық Закари Свайдаға жол берді — 5:7, 3:6.
Еске сала кетейік, бұдан бұрын Қазақстан жасөспірімдер құрамасының Дэвис кубогының іріктеу сайысын сәтті бастағанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).