АСТАНА. KAZINFORM - Қазақстанның екінші, әлемнің 31-ракеткасы Юлия Путинцева Ролан Гаррос турнирінің үшінші айналымына шықты.
Қазақстандық теннисші екінші айналымда дүниежүзілік рейтингіде 175-орында тұрған тайбэйлік Джоанна Гарлендпен шеберлік байқасты.
Бірінші партияда тай-брейкте Путинцева басым түсті - 7:6 (7:5). Екінші сет те отандасымыз үшін ойдағыдай өтті - 6:3.
Екі сағатқа жуық уақытқа созылған бәсекеде Путинцева 1 эйспен бірге 16 брейк-пойнттың үшеуін пайдаланды. Гарленд 2 брейктен (6 брейк-пойнт) аса алмады.
Үшінші айналым Путинцеваға нағыз сынақ болатын түрі бар. Ол әлемнің 6-ракеткасы, ресейлік, 18 жастағы Мирра Андреевамен шеберлік таластырады. М.Андреева екінші айналымда әлемнің 35-ракеткасы, америкалық Эшлин Крюгерді жолдан тайдырды - 6:3, 6;4.
Юлия Путинцева қазіргі кезде WTA Live рейтингісінде 27-орынға көтеріліп тұр.
Еске сала кетейік, бұдан бұрын Александр Бубликтің сенсация жасап, үшінші айналымға өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).