Осы жылдың 20 сәуірінде Рудный тау-технология колледжінде 35 студент тамақтан уланып қалған болатын. Оның 14-і ауруханаға жатқызылып, қалғаны амбулаторлық емге жіберілді. Барлығы колледж асханасында тамақтанғаннан кейін ауырған. Аталған факті бойынша прокуратураның бақылауымен сотқа дейінгі тергеу жүргізілді.
Анықталғандай, «S-Salta» ЖШС басшысы С.А.Шугубаева қабылданған міндеттерін елемей, санитарлық нормаларды бұзған, содан жаппай улану орын алды. Сонымен қатар «S-Salta» ЖШС басшысының көрінеу жалған құжаттарды, атап айтқанда медициналық тексеруден өту туралы медициналық кітапшаларды заңсыз пайдалануға қатысы бары анықталды.
Рудный прокуратурасы қылмыстық істі сотқа жолдап, мемлекеттік айыптауы қолдау тапқан.
2023 жылдың 7 тамызында сот үкімімен С.А.Шугубаева жалған құжаттар пайдаланғаны және санитарлық ережелерді бұзғаны үшін кінәлі деп танылып, екі жылға бас бостандығын шектелді.
Үкім заңды күшіне енген жоқ.