Қала әкімі Бақытжан Сағынтаев Instagram-дағы парақшасында жаңарған аулалар мен жаяу жүргінші аймақтарының қоғамдық кеңістік ажарын аша түскенін айтты.
«Ауданға жасаған жұмыс сапары кезінде аумақтарды өзгертуге кешенді түрде қарап, шаң-тозаң болмау үшін барлық бос учаскелерді барынша көгалдандыруды тапсырдым. Биыл ауданда 205 аула, 9 сквер жөнделіп, 5 бос учаске, 2 жағалау аймағы абаттандырылды. №10 ықшамаудандағы жаяу жүргіншілер аймағы жөнделіп жатыр», - деп жазды Алматы әкімі.
Қала әкімі бұл жұмыстардың барлығы тұрғындармен өткен есеп беру кездесуінде айтылған өтініштер бойынша жасалғанын атап өтті.
«Адамдардың көңіл-күйінің қалай жақсарып жатқанын байқау қиын емес. Ықшамаудандар өмір сүруге ыңғайлы болып түрленді. Ыңғайлы орындықтар, ойындарға арналған үстелдер, балалар алаңдары тұрғындарға ұзақ қызмет етері сөзсіз», - деді ол.
Б. Сағынтаев қала тұрғындары бұрынғыша өздері тұратын жерді абаттандырып, гүлдер мен ағаштар отырғызуды қолға алса деген ұсынысын білдірді.
«Тәртіпті сақтап, балаларымызға қаламызға ұқыпты қараудың үлгісін көрсетейік», - деді мегаполис әкімі.