Арал маңында балық өнеркәсібі қарқынды дамып келеді. Қызылорда облысында 22 балық өңдеу кәсіпорны бар, оның ішінде Еуропалық одаққа - 4-уі, Қытайға - 3-уі, Еуразиялық экономикалық одақ елдеріне - 9-ы өнімін экспорттайды.
Айта кетерлігі, ҚР Қаржы министрлігінің Мемлекеттік кірістер комитетінің мәліметтеріне сәйкес өткен жылы балық және балық өнімдерін экспорттау көлемі 56,5 млн долларды құрады, басқаша айтқанда, қазақстандық балықтың үштен екісі (⅔) экспортқа жіберіледі. Сонымен бірге, Қызылорда облысының экспортқа қосқан үлесі 12 млн доллардан асты (3 500 т).
Бақытжан Сағынтаев қуаттылығы жылына 6 000 тонна болатын «Арал балық өңдеу зауытының» өндірісімен танысты. Дайын өнім Ресей, Қытай, Польша, Голландия, Германия, Дания, Грузия, Әзербайжан және Өзбекстан нарықтарына экспортталады.
Түстен кейін Бақытжан Сағынтаев «Аралтұз» АҚ зауытының негізінде өңірдегі ИИДМБ жобаларын жүзеге асыру барысымен танысты.
Жақсықылыш ауылында йодталған тұз шығаратын жалғыз зауыт және ел аумағындағы ең ірі тұз өндіру және өңдеу кәсіпорны жұмыс істейді.
Индустриялық-инновациялық дамудың мемлекеттік бағдарламасы аясында «Аралтұз» компаниясы ас және техникалық тұзды өндіру бойынша екі испан цехын іске қосты. Бірінші цех еуропалық технология бойынша жұмыс істейді және йод қоспалары бар ас тұзының тоғыз түрін шығарады. 2016 жылы техникалық тұз өндірісін кеңейту мақсатында екінші испан желісі - полимерлік цех сатып алынды. Зауытты қайта құру еңбек өнімділігін екі есеге арттыруға және жұмыс орындарымен 1200-ден астам адамды қамтамасыз етуге, жұмысшылардың жалақысын 60%-ке арттыруға мүмкіндік берді. Өндіріс және өткізу көлемі үш есеге жуық өсті, ал экспорттық өнім үлесі 65%-ке жетті.
Еске сала кетсек, 2017 жылы «Аралтұз» АҚ 3,5 млрд теңгеге 332 600 тонна өнім өндірді. Өткен жылы экспорт көлемі 212 600 тоннаға жетті.