Қытайдың Ханчжоу қаласында өтіп жатқан Азия ойындарында бокстан Токио олимпиадасының қола жүлдегері, әлем чемпионы Сәкен Бибосынов алғашқы жекпе-жегін өткізді, деп хабарлайды ҚазАқпарат тілшісі.
Қазақстанның басты үміттерінің бірінен саналатын С.Бибосынов 51 келіге дейінгі салмақта 1/16 финалда моңғолиялық Орхонтунгалаг Унуболдпен жұдырықтасты.
Бірінші раундта төрешілер түгелдей басымдықты Сәкенге берді. Екінші, үшінші кезеңде де ештеңе өзгере қойған жоқ. Есеп – 5:0, Сәкен Бибосыновтың пайдасында.
Осылайша, қазақстандық боксшы келесі айналымға өтті.
Сәкен Бибосыновтың келесі қарсыласы - олимпиада чемпионы, өзбекстандық Хасанбой Дусматов.
Тағы бір қазақстандық Наталья Богданова 66 келіге дейінгі салмақта Сауд Арабиясының өкілі Рагад Ибрагим Аль-Наимиді бірінші раундта-ақ үш рет нокдаунға жіберіп, нокаутпен ұтты. Сөйтіп ол ширек финалға жолдама алды.
Еске сала кетейік, бұдан бұрын Азия ойындарында қазақстандық боксшылардың қашан рингке шығатыны белгілі болғанын жазған едік.
Сондай-ақ қазақстандық боксшы Азия ойындарын жеңіспен бастады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).