«Саламатты Қазақстан» медициналық пойызы Шақат станциясына 13 маусым күні сағат 2:03-те келді. «Денсаулық керуені» бекетте 14 маусым сағат 21:40-қа дейін тұрады. Сондай-ақ, пойыз кестесіне Павлодар облысының Красноармейка, Спутник, Тасқұдық, Майқайың, Бозшакөл, Өлеңті және Торғай сияқты станциялары енгізілген.
Естеріңізге сала кетейік, пойыздың медициналық құрамына терапевт, хирург, жалпы тәжірибе дәрігері, невропатолог, ультрадыбыстық диагностика дәрігері, акушер, зертханашылар, медбикелер, рентгенолог, сәулелік диагностика дәрігері, стоматолог, отоларинголог, психолог, окулист, гинеколог және уролог кіреді. ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның бастамасымен алғаш рет азаматтарға тиімді психологиялық, құқықтық және медиативтік (татуластыру) көмек көрсететін кәсіби психолог, медиатор және заңгер жұмыс істеуде. Бұдан басқа, азаматтардың мемлекеттік әлеуметтік қолдау алу, зейнетақы, жәрдемақы, әлеуметтік төлемдер және атаулы әлеуметтік көмек алу құқықтарын қорғау мәселелері бойынша тегін кеңестер өткізіледі.
23 мамырдан 12 маусымға дейін «Саламатты Қазақстан» медициналық пойызы ШҚО мен Абай облысының 11 шалғай станциясында (Жарма, Ертіс зауыты, Тишинская, Ермаковка, Таусамалы, Алтай, Күмістау, Шар, Суықбұлақ, Бел-Ағаш, Дегелең) болды. Мұнда консультативтік-диагностикалық пойыздың дәрігерлері 7 104 тұрғынды, оның ішінде 1 031 баланы қабылдады. Дәрігерлерге қаралудың жалпы саны – 19 414. 550 шағын хирургиялық операция жасалды.
Пойыздағы әр маман, атап айтқанда жалпы тәжірибе дәрігері, терапевт, педиатр – 1 665 адам, хирург – 2 282, уролог – 2 224, невропатолог – 1 964, офтальмолог – 2 660, ЛОР – 1 425, акушер-гинеколог – 739, стоматолог – 1 497, ЭКГ – 952, УДЗ – 2 936, ФЛГ – 412 және кардиолог 108 адамды тексерді.
Әйелдер істері және отбасылық-демографиялық саясат жөніндегі ұлттық комиссияның медиаторы мен заңгері халықты әлеуметтік қолдау мәселесінде ауқымды жұмыс атқарды. ШҚО-ның 10 шалғай станциясында азаматтардан 510 өтініші қабылданып, 46 медиативтік келісімге қол қойылды.
«2013 жылы ажырасқан, бұрынғы күйеуі алимент төлемейтін әйелдің жағдайын қарадық. Оның 3 кәмелетке толмаған баласы бар, қарт ата-анасымен бірге апатты 2 бөлмелі пәтерде тұрады, көмек сұрайды. Мен аудан әкімінің орынбасарын шақырып, оған жалға берілетін тұрғын үйге кезекке тұруға көмектесуін өтіндім. Олар көмектесетін болды. Сондай-ақ, шағын бизнесі үшін мәдениет үйінен ақысыз бөлме жалдауды ұсынды. Күзде пәтер бөлінеді», - дейді кәсіби медиатор Жанара Өсіпбекова.
Сондай-ақ, Абай облысының бес станциясында 330 өтініш қабылданып, 32 медиативтік келісім жасалды. Семей полигоны ауданында тұратын тұрғындар үшін әлеуметтік жәрдемақы болмауының мәселесі – 48, мемлекеттік тұрғын үйге кезекке қою – 22, жылжымайтын мүлік құжаттарын ресімдеу – 31, грант бойынша шағын бизнес ашу – 55, мүгедектерге жәрдемақы алу – 18, алимент төлеу – 11, несиені кейінге қалдыру – 35, жұмыс іздеу – 27, қоғамдық көліктің, аурухананың, дәріхананың, жұмыстың болмауы мәселесі – 63 өтініш берілген.
Айта кетейік, жобаны «Самұрық-Қазына» АҚ компаниялар тобының атынан «Samruk-Kazyna Trust» әлеуметтік жобаларды дамыту қоры Денсаулық сақтау министрлігінің қатысуымен, «Әлеуметтік жобалар қоры» ҚҚ жүзеге асырып отыр. Ақпараттық серіктес – Jibek Joly телеарнасы.