Сәлем, Көкшетау: Ақмолада облыстық байқау-фестиваль өтті
КӨКШЕТАУ. KAZINFORM — Көкшетауда вокалды-аспаптық ансамбльдер мен кавер топтар арасында Ақмола облысының 85 жылдығына арналған «Сәлем, Көкшетау!» облыстық байқау-фестивалі өтті.
Ақмола облысы мәдениет басқармасы жанындағы облыстық халық шығармашылық және мәдени демалыс орталығының ұйымдастыруымен өткен ән кешіне Егіндікөл ауданынан «Сазды әуен», Ерейментау ауданынан «Портал», Зеренді ауданынан «Жалын», Астрахан ауданынын «Алау», Атбасар ауданынан «Мерей» вокалды-аспаптық ансамбльдері қатысты.
Көкшетау қаласының тұрғындары мен қонақтарының мәдени-демалыс іс-шараларына қызығушылығын арттыру, ұжымдардың шығармашылығын насихаттау бағытында ұйымдастырылған шарада қазақстандық авторлардың және шетелдік танымал эстрада әндері шырқалды.
Шараға Ақмола облысы мәдениет басқармасының басшысы Айгүл Сәбитова қатысып, өнерпаздарды диплом және бағалы сыйлықтармен марапаттады.
Айта кетсек, бұдан бұрын Көкшетауда 2-ші халықаралық комедиялық қойылымдар фестивалінің үздіктері марапатталғанын жазған едік.