Министрдің сөзіне қарағанда, егер бүгінгі күні тұтастай корпоративтік табыс салығын жергілікті органдарға қалдырса, олардың трансферті кез келген салықтан асып түседі. «Сондықтан да, бүгінгі күні біздің алдымызда салық базасын кеңейту туралы мәселе тұр. Бұның өзі шағын және орта бизнесті дамыту, салық төлеушілердің қатарын арттыру деген мәселелерді де тұтастай қамтымақ», - деді министр.
Оның айтуынша, қазіргі таңда салықтың барлық түрлері бойынша түсімдер құбылмалы болып отыр. Мәселен, түрлі себептерге орай, ағымдағы жылы 240 млрд теңге шамасындағы қаражат «жоғалған».
«Яғни, егер субвенциялық аудандарға олардан түсетін барлық салық түрлерін қалдырсақ, бұл жергілікті атқарушы органдар үшін салықтық базаның тұрақтылығына кепіл болады деген сөз. Өйткені, дотациялық бюджеттер құрылымында тек 30-35 пайызы ғана салық есебінен қамтылады», - дейді министр.
Еске сала кетейік, заң жобасы ҚР Президентінің мемлекеттік басқару деңгейлері арасындағы функциялардың аражігін ажырату жөніндегі негізгі қағидаттары мен тәсілдерін іске асыруға бағытталған.