ОРАЛ. ҚазАқпарат - Жапонияның Нарита қаласында самбодан ересектер арасында 21-23 қараша аралығында өтіп жатқан әлем чемпионатының алғашқы күні Қазақстан құрамасы қос қола жүлдені иеленді.
Халықаралық самбо федерациясының ресми сайтынан алынған мәліметке қарағанда, бірінші күні тоғыз салмақ дәрежесі бойынша медальдар сарапқа салынды. Өкінішке қарай, спорттық самбодан әйелдер арасында 48, 60, 72 келі және ерлерден 52, 68 және 90 келіде қазақстандықтардан ешкім жүлдеге іліге алған жоқ. Тек әскери самбодан ғана 57 келіде Олег Удод, 74 келіде Аңсаған Құсайынов үшінші орынға көтеріле алды.
Бүгін әлем біріншілігі жалғасады. Батысқазақстандықтар 57 келі салмақта кілемге шығатын самбодан әлемнің төрт дүркін чемпионы Ерболат Байбатыровтан үміт күтеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).